Am-pitiavana no andraisana anao mitsidika ity tranon-kalan’ny FJKM Rennes Laval ity. Bienvenue sur le site de l’Église FJKM Rennes Laval

fjkmrl
 
Alahady 01 Febroary 2026, Rennes
 
Alahadin’ny Diakona Rennes Laval, fiarahabana ireo nahazo diplôma.
 
Tontosa tamin’ny Alahady 01 Febroary 2026 teo ny Alahady natokan’ny FJKM Rennes Laval ho an’ny Diakona sady ho fiarahabana ireo nahazo diplôma tamin’iny taona 2025 iny. Izany dia narahina Fanasan’ny Tompo.
 
Ireto avy no nandray anjara tamin’izany fotoana izany:
– Fotoana ho an’ny Ankizy sy ny Tanora : Rtoa Ramiandrisoa Koloina
– Vavaka sy Vakiteny 1 : Atoa Raheriarivelo Richard
– vakiteny 2 : Atoa Randriamasinoro Vonjy Mamy
– vakiteny 3 : Rtoa Rakotovazaha Vonjy
– Nitarika sy nitoriteny: Nofy Andriatsilavina, Mpitandrina
 
Toy izao ny toriteny tamin’izany:
Kristiana miaro ny tenany tsy hovoaheloka mandrakizay
Chrétien qui s’auto‑protège de la damnation éternelle
Misy fotoana ve Andriamanitra mamoaka fitsarana tsy azo ivalozana?
Eny, misy. Tsy hoe “tsy hainy ravaina” akory, fa hoe tsy tiany iverenana, satria efa tonga amin’ny teboka izay tsy misy fibebahana intsony ny fon’olona.
Ao amin’ny tantaran’i Ely sy ny taranany, dia niteny mazava Andriamanitra hoe:
“Tsy hisy fanatitra hahafaka ny helony mandrakizay.”
Mafy izany. Ary izany indrindra no mampitandrina antsika: misy fahotana izay tsy hoe tsy azo avela, fa tsy tian’Andriamanitra iverenana intsony, satria efa lasa fomba fiaina, efa lasa fanoherana mivantana Azy.
1. Tsy milona anaty fahotana lalina
Ne pas s’accommoder des péchés profonds
Ny antony voalohany nahatonga ny didim-pitsarana tsy azo ivalozana dia ny fahotana lalina sy maharitra.
Tsy kisendrasendra intsony, tsy fahalemena intsony, fa fahotana miorim-paka.
Toy ny zanak’i Ely, izay:
nanao fahotana tsy an-kijanona,
tsy niala tamin’ny faharatsiana,
ary nahatonga ny fiainany ho marikoriko eo imason’Andriamanitra.
Ny Kristiana miaro ny tenany dia tsy manaiky ho tonga mpianakavin’ny fahotana, fa miala, mitsangana, ary mitady fanadiovana isan’andro.
2. Tsy maniratsira ny fahamasinan’Andriamanitra
Ne pas blasphémer la sainteté de Dieu
Ny zanak’i Ely dia naniratsira mivantana ny fahamasinan’Andriamanitra:
mpangalatra tamin’ny fanatitra (1 Sam. 2:12–17)
mpijangajanga tao amin’ny fitoerana masina (2:22)
tsy nahalala an’i Jehovah (2:12)
Izany no antsoina hoe faniratsirana ny fahamasinan’Andriamanitra.
Rehefa entintsika ao amin’ny Fiangonana ny fahotana, rehefa ataontsika fanao ny zavatra manala baraka an’Andriamanitra, dia miditra amin’ny lalana mampidi-doza isika.
Ny Kristiana miaro ny tenany dia mitandrina ny fony, ny teniny, ny fihetsiny, ary ny toerana ametrahany ny tenany.
3. Tsy manompo andriamani-tsy Izy
Ne pas adorer un autre Dieu
Ely dia nanao hadisoana lehibe: olona no nofidiany noho Andriamanitra.
Nekeny hatrany ny zanany, na dia fantany aza fa manota.
Tsy sahiny nanitsy, tsy sahiny nijoro ho amin’ny marina.
Izany dia endrika fanompoana andriamani-kafa:
fitiavan’olona mihoatra ny fitiavana an’Andriamanitra.
Ho antsika ankehitriny, mety ho vola, asa, voninahitra, na fitiavan-tena no lasa andriamani-kely.
Ny Kristiana miaro ny tenany dia mifikitra amin’Andriamanitra irery ihany, ary tsy mamela zavatra hafa hanjaka amin’ny fony.
Famaranana
Lava ny tantara, mafy ny ohatra, fa mazava ny hafatra:
Misy ny “fahotana tsy voafafan’ny fanatitra” — izany hoe fahotana tsy tian’Andriamanitra iverenana intsony, satria efa lasa fanao, efa lasa fitiavana, efa lasa fanoherana Azy.
Koa:
– ialao ny fitoerana anaty ota, sao tamana ao ka tsy afaka intsony
– ialao ny faniratsirana an’Andriamanitra, aza entina ao an-tranony ny fahalotoana
Andriamanitra no tokony hinoana, fa tsy olona — eny, mamy ny
zanaka, fa tsy tokony ho rarahana menaka ny fahotany
Ary dia miteny amintsika ny Soratra Masina:
“Tandremo ny tenanao sy ny fampianaranao, ka mahareta amin’izany; fa raha manao izany ianao, dia hamonjy ny tenanao sy izay mihaino anao.”
— I Timoty 4:16
 
Daty manaraka:
– 08 Febroary 2026, Laval, miditra amin’ny 10 ora tsy diso.
Nanao ny tatitra PNA