Isaorana Andriamanitra fa tontosa soamantsara ny fanompoam-pivavahana izay notontosana tany Lorient teo ary voalohany izany tamin’ny fiarahana tamin’ny Mpitandrina vaovao voatendry hiahy ny Fiangonana.

Ny fandaharana dia ezaka voalohany niarahan’ny FIMPI-Z izay vao nahazo fiofanana sy ny Mpitandrina ka ny nampiavaka azy dia ny fisian’ireo « Saxophone » anakiroa sy ny fisian’ireo karazana « guitare » sy ny fisian’ny « guitare bass » izay tena nanome aina ny fanompoam-pivavahana. Tsy latsa danja tamin’izany koa ny fampiasana ny « orgue ». Niavaka ihany koa ity fanompoam-pivavahana ity satria betsaka ny tanora manodidina an’i Lorient sy Vannes izay tonga nanatrika, miisa 74 ny mpiangona tonga ary nisy mpandray Fanasan’ny Tompo 50 niaraka niombon-databatra tamin’io.

Toy izao no fizotry ny toriteny: niainga tamin’ny tantaran’ny diany ny Mpitandrina (hitantsika ato anaty pejy ato ny zava-nisy notantarainy) avy eo dia natodiny tamin’ilay voalazan’ny Fanekem-pihavanana taloha ao amin’ny Bokin’i Mika Mpaminany, toko faha- 7 ny andininy faha 7 ka hatramin’ny faha 10 ny toriteny ka nomeny

– ny lohahevitra hoe « Jehovah no fahazavana » (Dieu est la lumière, El IOR), nizara ho telo lehibe ny toriteny:

– Ny fizarana voalohany dia hoe Jehovah no fahazavana ka mampiharina (Dieu est la lumière qui relève).

– Ny fizarana faharoa dia hoe Jehovah no fahazavana ka mananatra (Dieu est la lumière qui éduque)

– Ny fizarana fahatelo dia ny hoe Jehovah no fahazavana ka manome fanantenana (Dieu est la lumière qui donne de l’espérance)

Ireto avy no nandray anjara tao anatin’ny fanompoam-pivavahana:

– Ny nivavaka mialoha ny vakiteny dia Rtoa ANDRIAMIHAMINARIVO Koloina

– Ny namaky ny Fanekem-pihavanana taloha (Mika 7, 7-10) dia Atoa RANDRIAMIALISON Rantoniaina Henintsoa

– Ny namaky ny Fanekem-pihavanana vaovao (Lioka 21, 5-11) dia Rtoakely RAJAONARIVELO Miora

– Ny namaky ny Epistily (I Jaona 2, 24-29) dia Atoa RASOANANTOANINA Nomena Sitraka

– Ny nanao ny vavaka aorian’ny toriteny sy fangatahana dia Atoa RATSIMBAZAFY Kiady Sandratra

Ireto no vaovao tsara ho fantatra:

– Ny 30 Novambra no hoavy hitsidika ny Fiangonana ny Synodamparitany Fatofehizoro Ampitandranomasina ka izy ireo no hitarika sy hitory amin’io fotoana io izay sady « hametrahana amin’ny fombam-piangonana ny Mpitandrina Nofy Andriatsilavina mianakavy », hanomboka amin’ny 10h30 amin’ny fianaran-kira ny Fiangonana ary hanohy avy hatrany amin’ny Fanompoam-pivavahana amin’ny 11ora tsy diso. Ao Rennes no hanaovana izany fotoana izany

– Ireto avy ny fiofanana izay tanterahina: Isaky ny Asabotsy 1 dia ny STK no miofana, ny Alahady 1 dia ny Fiangonana no miofana, ny Sabotsy 4 kosa dia manao fiofanana en ligne ny Diakona ary ny Alahady 4 dia misy fiofanana présentiel.

– Mila miomana amin’ny Krismasy ny rehetra izay hotanterahina any Rennes ny 25 Desambra 2025

– Fotoana manaraka : 30 Novambra dia fametrahana ny Mpitandrina, 07 Desambra : Alahadin’ny Sekoly Alahady Rennes.

Nisy avy eo ny fandraisana ny Fanasan’ny Tompo sy ny fifaliana nifampizarana tamin’ny fifampizarana sakafo.

Nanao ny tatitra PNA